Programa de teleasistencia da Comunidade Autónoma Galega
SERVIZO DE TELEASISTENCIA DA COMUNIDADE AUTÓNOMA DE GALICIA PARA PERSOAS EN SITUACIÓN DE DEPENDENCIA
Acceso ao servizo
Para solicitar o servizo é necesario iniciar expediente de valoración de dependencia. Segundo establece a normativa vixente garantirase o dereito subxectivo para a atención das persoas en situación de dependencia.
Pese a elo, logo de ter garantida a atención as persoas que se atopan na situación anterior e sempre que haxa dispositivos de teleasistencia dispoñibles, tamén poderán acceder a este servizo aquelas persoas que na solicitude de recoñecemento de dependencia sinalen como expectativa o servizo de teleasistencia e que non lles fora recoñecido grao de dependencia.
No contrato asinado coa Cruz Vermella para a prestación do servizo de teleasistencia e co fin de facilitar o acceso ao servizo ás persoas que carezan de telefonía fixa ou que teñan un sistema incompatible coa teleasistencia convencional , proporcionase o acceso mediante un terminal dotado de tarxeta GSM que non terá custo engadido para o usuario.
Normativa reguladora do servizo:
- Orde do 2 de xaneiro de 2012, pola que se regula o procedemento para o recoñecemento da situación de dependencia e do dereito ás prestacións do sistema para a autonomía persoal e a atención á dependencia, o procedemento para a elaboración do Programa Individual e a organización e funcionamento dos órganos técnicos competentes (DOG nº 9, do 13 /01/2012).
Concretamente os artigos e disposición que se sinalan a continuación:
- Artigo 23 (sobre a intensidade do servizo de teleasistencia)
- Artigo 27 (suspensión temporal do servizo)
- Artigo 32 (libranza vinculada ao servizo)
- Artigo 34 (determinación da contía)
- Artigo 47 (intensidade da libranza)
- Artigo 60 (compatibilidade con outros servizos ou libranzas)
- Disposición adicional 6ª (solicitude do servizo de teleasistencia a través do SADD)
- Orde do 19 de abril de 2013 pola que se modifica a Orde do 2 de xaneiro de 2012 de desenvolvemento do Decreto 15/2010, do 4 de febreiro (DOG nº 86, do 6/5/2013). Modifica os artigos 27 e 47 indicados anteriormente.
- Decreto 149/ 2013, do 5 de setembro, polo que se define a carteira de servizos sociais para a promoción da autonomía persoal e a atención ás persoas en situación de dependencia e se determina o sistema de participación das persoas usuarias no financiamento do custo (DOG nº 182, do 24/09/2013).
- Resolución do 15 de xaneiro de 2018 da Secretaria de Estado de Servizos Sociais e Igualdade, pola que se publica o Acordo do Consello Territorial de Servizos Sociais e do Sistema para a Autonomía e Atención á Dependencia, sobre determinación do contido do servizo de teleasistencia básica e avanzada (BOE nº 41 do 15/2/2018)
Teleasistencia Avanzada:
O servizo de teleasistencia avanzada poderá asignarse como prestación complementaria para persoas en situación de dependencia recoñecida en grao I, II ou III, e soamente como prestación única a persoas que teñan recoñecido un grao I de dependencia moderada.
Polo tanto, no caso de revisión de grao das persoas con dependencia recoñecida en grao I que teñen o servizo asignado como prestación única, cando se lles recoñeza o grao II ou III, poderase dar continuidade ao servizo, como un servizo complementario das prestacións destes graos, en función da avaliación do equipo de valoración técnica que será quen determine a adecuación do devandito servizo, en función de requirimentos físicos e psíquicos necesarios para o seu uso.
Características establecidas para a asignación do servizo de teleasistencia avanzada.
Este servizo considérase axeitado, para as persoas que teñan, entre outras, algunha das características que a continuación se relacionan:
- Persoas que requiren apoios con seguridade e independencia no seu fogar como complemento a outros servizos.
- Persoas en risco de soidade, illamento ou perigo.
- Persoas en risco de accidente ou perda de conciencia.
- Persoas con dificultades na mobilidade.
- Persoas con diabetes, hipertensión, bronquites ou asma.
- Persoas con limitacións temporais.
- Persoas en situación de demencias leves ou con inicios e sinais de esquecementos.
- Persoas con incontinencia.
- Persoas con necesidades de mellora ou rehabilitación física, cognitiva e/ou funcional.
- Persoas que poden incorrer en riscos para a súa saúde fora da contorna domiciliaria.
Compatibilidade con outros servizos e libranzas :
O servizo de teleasistencia será compatible con todos os servizos ou libranzas a excepción do servizo de atención residencial ou da libranza vinculada á adquisición dun servizo de atención residencial.
Participación da persoa usuaria no financiamento do custo do servizo:
A determinación da participación no custo do servizo de teleasistencia ata nova instrución, será dun copago de 5€ para os usuarios cunha capacidade económica igual ou superior o 100% do IPREM e non terá copago cando sexa inferior o 100% do IPREM.
A solicitude pode tramitarse nos servizos sociais do concello de residencia ou centro de saúde.
Máis información no Teléfono Social ( gratuito as 24 horas do dia): 900 333 666