Atención temperá

Tes unha dúbida?

O servizo de atención temperá é un conxunto de intervencións dirixidas á infancia de 0 a 6 anos, ás súas familias e á súa contorna, co obxectivo de dar resposta o antes posible ás necesidades transitorias ou permanentes dos nenos e nenas con trastornos no desenvolvemento ou con risco de presentalos.

 

Preguntas habituais

1. Que é a atención temperá?

Enténdese a atención temperá como un conxunto de intervencións dirixidas á poboación infantil de 0 a 6 anos, á súa familia e ao seu contorno, e que ten por obxectivo dar resposta o antes posible ás necesidades transitorias ou permanentes que presentan os nenos e as nenas con trastornos no desenvolvemento ou en risco de padecelos, para facilitar o desenvolvemento da súa autonomía persoal e a inclusión social.

2. Cal é a clave da atención temperá?
Podemos dicir que a clave está na palabra temperá; canto máis axiña se detecten as posibles dificultades, mellores resultados se poden obter da atención profesional. Así é que as familias deben estar ben informadas sobre o proceso evolutivo normalizado dos seus fillos e fillas, para poder detectar calquera dificultade coa maior prontitude.
3. Que ofrece a Rede galega de atención temperá?
 
Nos servizos de atención temperá ofrecerase unha intervención biopsicosocial que favoreza a adquisición ou a recuperación de funcións e de habilidades persoais e sociais para a mellora da autonomía, da convivencia social e familiar e da inclusión social.
4. Que son os trastornos do desenvolvemento?

Son situacións nas que, como consecuencia dunha alteración das estruturas ou funcións corporais, de restricións na participación social ou a causa de factores do contorno, se produce unha desviación ou atraso significativo no desenvolvemento das capacidades, adquisicións e recursos persoais típicos nos nenos e nenas.

5. Que se denomina risco de trastorno do desenvolvemento?

Enténdense por situacións de risco de padecer un trastorno no desenvolvemento
aquelas circunstancias de vulnerabilidade evolutiva que requiren intervención pola descompensación negativa entre factores de risco e protección.

6. A quen se dirixe a atención temperá?

Aos nenos e nenas de 0 a 6 anos con trastornos no desenvolvemento ou en situacións de risco de padecelos, residentes na Comunidade Autónoma de Galicia, así como ás súas familias e ao seu contorno.

7. Quen desenvolve a atención temperá en Galicia?

A atención temperá é unha competencia da Xunta de Galicia, compartida polas consellerías de Política Social, Sanidade e Educación, que contan cunha rede de equipos de intervención integrada na Rede galega de atención temperá.

Estes equipos están formados por profesionais de distintos ámbitos que traballan de maneira coordinada e interdisciplinar. En función da valoración e das necesidades detectadas en cada caso, a intervención realízase desde as diferentes áreas especializadas, co obxectivo de garantir unha atención integral e adaptada a cada neno ou nena e á súa familia.

8. Cal é o procedemento para recibir atención temperá?

A familia deberá acudir ao servizo de pediatría do centro de saúde que lle corresponda e informará o pediatra da sospeita de trastorno do desenvolvemento.
Será este profesional quen fará o diagnóstico previo, en función do cal derivará a familia á unidade de atención temperá máis axeitada para o caso.

9. Quen pode informar dunha sospeita de trastorno do desenvolvemento nun neno?

Na maioría dos casos son as propias familias as que detectan ou expresan a sospeita dun posible trastorno no desenvolvemento. Non obstante, estas situacións tamén poden ser identificadas nas escolas infantís, nos servizos sociais comunitarios ou por outros profesionais e recursos que atenden ao neno ou nena e á súa contorna familiar.

Cando a sospeita se detecta fóra do ámbito familiar, deberase informar á familia ou ás persoas responsables do menor para que acudan ao servizo de pediatría, desde onde se iniciará o procedemento de valoración e derivación que corresponda.

10. A onde debo dirixirme para obter máis información?

As familias poden dirixirse a diferentes servizos para recibir información, orientación e iniciar o procedemento de acceso á atención temperá:

  • Servizo de pediatría do Hospital máis próximo: ademais de ofrecer información e orientación, realizarase unha primeira valoración da situación do neno ou da nena e, de ser necesario, efectuarase a derivación á Unidade de Atención Temperá correspondente.
  • Servizos sociais comunitarios do concello de residencia: o persoal de traballo social informará sobre o procedemento de acceso e os recursos sociais dispoñibles para as familias.
  • Servizo de orientación do centro educativo: o equipo de orientación do centro poderá ofrecer asesoramento e apoio no proceso de derivación e seguimento.
     

 

 

Normativa

 

VÍDEOS PARA PERSOAS CON DISCAPACIDADE AUDITIVA.

Adxuntos: