As casas do maior son un servizo gratuíto de atención diúrna a persoas maiores de 60 anos, similar aos centros de día, pero con 5 prazas cada unha para asegurar un coidado personalizado.
O servizo é prestado por un profesional autónomo ou por cooperativas de traballo, e localízanse en concellos que non contan con centros de día.
- Quen pode asistir a unha casa do maior?
-
Están destinadas a persoas maiores de 60 anos sen dependencia, ou con dependencia grao I, empadroadas no concello onde se sitúa a casa do maior (ou nos concellos limítrofes se non contan con recursos de atención diúrna a maiores).
- Canto tempo pode pasar o usuario na casa do maior?
-
A persoa usuaria pode acudir 8 horas ao día, de luns a venres, con horario flexible pactado coa casa do maior.
As casas do maior abren 11 meses ao ano. Só permanecen pechadas as fins de semana, os festivos e un mes de vacacións.
- Que servizos prestan?
-
As casas do maior ofrecen unha atención integral durante o día, centrada no benestar e no acompañamento personalizado de cada persoa usuaria.
Nestes recursos desenvólvense actividades de envellecemento activo, estimulación cognitiva, apoio na hixiene persoal e outras accións adaptadas ás necesidades individuais.
Ademais, poden incluír:
- Servizo de manutención, para as persoas que o precisen, cun custo de entre 7 e 10 euros ao día.
- Servizo de transporte, nas casas nas que a promotora solicitase esta modalidade.
- Canto custa?
-
O servizo de atención nas casas do maior é gratuíto para as persoas usuarias, ao estar financiado pola Xunta de Galicia.
- No caso de optar polo servizo de manutención, aplicarase un custo adicional de entre 7 e 10 euros ao día.
- Nas casas que dispoñan de servizo de transporte, este será gratuíto.
- Que debo facer para solicitar unha praza para un familiar?
-
Deberá dirixirse aos servizos sociais do seu Concello, onde recibirá o asesoramento preciso para realizar os trámites necesarios e iniciar o procedemento.
- Información para as promotoras de casas do maior
-
A Xunta de Galicia concede unha axuda a aquelas persoas que queiran poñer en marcha unha casa do maior no seu municipio, sempre e cando o Concello non conte con centro de día e reúna as condicións mencionadas na normativa.
O Goberno galego concede unha subvención de máis de 24.000 euros anuais por prestar o servizo, ao que se lle engaden 12.100 euros anuais se prestan servizo de transporte, e 15.000 euros adicionais ao inicio da actividade pola adecuación do espazo. Durante as baixas por maternidade aboarase un complemento de 150 euros semanais.
As subvencións solicítanse a través do procedemento BS212A da sede electrónica da Xunta de Galicia