Nova
Compartir
A Xunta pon en valor no Día Mundial da ELA o labor de Agaela en favor dos doentes e das súas familias
Fabiola García reafirmou o compromiso da Administración autonómica e lembrou que Galicia foi pioneira na prestación para pagar os gastos derivados da enfermidade
Reclamou de novo ao Goberno central que amplíe a todos os doentes as axudas da Lei ELA, que só reciben menos do 10% dos galegos que as precisan
Culleredo (A Coruña), 21 de xuño de 2026.
A conselleira de Política Social e Igualdade, Fabiola García, participou hoxe nos actos polo Día Mundial da Esclerose Lateral Amiotrófica (ELA) organizados pola Asociación Galega de Esclerosa Lateral Amiotrófica (Agaela) e puxo en valor o labor que realiza esta entidade en favor dos doentes desta enfermidade e das súas familias.
Fabiola García destacou así que Agaela é “o soporte para moitas familias” e gabou o seu esforzo e tesón para visibilizar a enfermidade e consolidar dereitos. Neste sentido, garantiu que a Xunta seguirá estando ao carón dos doentes, reforzando as axudas e o apoio. Axudas pioneiras, lembrou, como os 12.000 euros anuais para cubrir os custos derivados da doenza dos máis de 200 galegos afectados.
Neste punto, a conselleira lamentou que as medidas do Goberno central para os enfermos recollidas na Lei ELA apenas cheguen a menos do 10% dos galegos con esta enfermidade e reclamou, unha vez máis, que as estenda a todos os que as precisen. Do mesmo xeito, demandou que poidan utilizar esta prestación estatal nos servizos que mellor se adapten ás súas necesidades.
Fabiola García reafirmou por último o compromiso da Administración autonómica cos enfermos de ELA, coas súas familias e coas entidades que traballan por todos eles para seguir “avanzando, mellorando e contribuíndo a que gañen calidade de vida”.