Nova

Santiago de Compostela, 17 de xuño do 2026

A conselleira de Política Social e Igualdade, Fabiola García, destacou o aumento das prazas residenciais financiadas con fondos públicos existentes en Galicia, que hoxe se sitúa xa por riba das 18.000, o triplo das que había en 2009. Fíxoo no Pleno do Parlamento autonómico en resposta a unha pregunta oral, na que sinalou que a Xunta podería crear e manter máis centros “se o Goberno central pagase os 250 millóns de euros que deixou a deber o ano pasado a todos os dependentes galegos”.

No que atinxe á situación da atención ás persoas maiores da Estada, Fabiola García, puxo en valor a residencia pública autonómica coa que xa conta este municipio e que ademais serviu de exemplo para a implantación do novo modelo de coidados Galicia Calidade.

Ao respecto, apuntou que o centro estradense foi o primeiro da rede da Xunta en dotarse de novos adiantos tecnolóxicos para mellorar o benestar e a atención dos seus usuarios, como sensores nas habitacións para advertir de calquera incidencia ou dispositivos multiparamétricos para o control do estado de saúde dos residentes.

A conselleira apuntou que o Goberno galego traballa para que as persoas maiores poidan elixir libremente onde e como queren pasar esta etapa das súas vidas. Con esta finalidade, a Xunta creará nestes tres anos 3.500 novas prazas residenciais e, para aqueles que prefiren estar nas súas casas, reforzouse o Bono Coidado no Fogar e incrementouse nun 50% o financiamento do Servizo de Axuda no Fogar (SAF).