Nova

Ourense, 09 de xuño de 2026

O delegado territorial da Xunta en Ourense, Manuel Pardo, desprazouse esta mañá ao concello de Lobios  para visitar, da man da súa alcaldesa, María del Carmen Yáñez,  o Hotel Balneario Lobios Caldaria, un dos catro establecementos ourensás incluídos na duodécima edición do programa Benestar en Balnearios, no que a Xunta inviste máis de 331.000 euros financiando estadías en réxime de pensión completa, para persoas da nosa comunidade maiores de 60 anos ou pensionistas de máis de 55.

O delegado territorial lembrou que está aberto o prazo de presentación de solicitudes para esta iniciativa da Consellería de Política Social e Igualdade ata o día 26 de xuño,  que cumpre un dobre obxectivo, por unha banda, mellorar a calidade de vida dos maiores a través do fomento de actitudes positivas para o autocoidado da saúde e do impulso das relacións sociais, e por outra, dinamizar a economía local aproveitando a riqueza termal de Ourense, que é un dos principais destinos de turismo de augas mineromedicinais de España.

Manuel Pardo destacou que nesta edición o Goberno galego ofrece máis de 1.270 prazas e aumenta as quendas para incluír os meses de verán, co fin de seguir desfrutando das oportunidades que ofrece a nosa comunidade, como o termalismo, nunha experiencia que mestura lecer, saúde e descanso desde xullo ata decembro. Neste marco, sinalou a importancia dos recursos naturais e culturais da provincia de Ourense, que camiñan a carón da sustentabilidade como criterio para alcanzar unha mellor calidade de vida, e como a recuperación e preservación dos recursos naturais contribúen de xeito importante ao desenvolvemento socioeconómico do territorio.

O representante do Goberno galego recordou que o programa forma parte da aposta da Consellería de Política Social e Igualdade polo envellecemento activo e saudable. Neste sentido, sinalou que a Xunta conta con aulas sénior e con convenios coas tres universidades para aquelas persoas que queiran seguirse formando; e tamén se impulsou este ano o Carné +65, que permite ofrecer descontos, vantaxes e viaxes para desfrutar desta nova etapa.

Establecementos na provincia de Ourense

O programa tamén inclúe, na provincia de Ourense, os balnearios Arnoia Caldaria Hotel, no concello de A Arnoia; Hotel Balneario Laias Caldaria, no concello de Cenlle, e o Gran Balneario do Carballiño, con aloxamento na Residencia de Tempo Libre do Carballiño.

As solicitudes faranse preferentemente por medios electrónicos a través do formulario dispoñible na sede electrónica da Xunta de Galicia. De maneira opcional, tamén poderanse presentar por rexistro ou nas Oficinas de Correos.

Reunión coa alcaldesa de Lobios

O delegado territorial da Xunta en Ourense, Manuel Pardo, aproveitou a súa estadía na contorna para manter un encontro coa alcaldesa de Lobios, María del Carmen Yáñez, e coñecer de primeira man as necesidades do municipio.

Manuel Pardo trasladoulle “o compromiso da Xunta de acometer os investimentos necesarios e traballar de forma conxunta para garantir o benestar de todos os veciños do concello”.