Nova

Santiago de Compostela, 5 de xuño de 2026

A conselleira de Política Social e Igualdade, Fabiola García, destacou esta mañá que Galicia é a primeira comunidade de España en formar en violencia de xénero dixital a todo o persoal técnico que traballa directamente coas vítimas. Esta formación faise a través dunhas xornadas desenvolvidas en cinco cidades (Ourense, A Coruña, Lugo, Pontevedra e Santiago de Compostela) e que finalizaron hoxe na capital galega. No acto de clausura tamén participaron o director xeral de Loita contra a Violencia de Xénero, Roberto Barba, e a presidenta da asociación Stop Violencia de Género, Encarnación Iglesias.

Na súa intervención, a conselleira destacou que este plan de formación especializada “é pioneiro a nivel nacional” e explicou que se enmarca na futura Lei Galega de Acoso e Violencia Dixital, que a Xunta está ultimando. O obxectivo é dotar aos profesionais de ferramentas prácticas para detectar, avaliar e intervir ante estas formas de violencia, que requiren dunha resposta profesional especializada e que sofren en maior medida mulleres e menores de idade.

Fabiola García explicou que unha das claves deste programa, no que participaron 200 profesionais de toda Galicia, “é a necesidade de acompañar axeitadamente as vítimas” e detallou que un dos avances máis innovadores é a creación de mecanismos de coordinación entre profesionais e institucións “que eviten que as vítimas teñan que revivir experiencias dolorosas ao repetir a súa historia ante cada servizo ou departamento”. “Creando unha rede de apoio sólida, coordinada e centrada nas persoas”, asegurou.

Outros dos eixos deste plan de formación son a prevención e o empoderamento dixital, xa que, segundo destacou a conselleira, “protexer tamén significa informar, educar e dotar á cidadanía de ferramentas para recoñecer riscos e defender os seus dereitos na contorna dixital”.

Finalmente, a conselleira reafirmou  o compromiso da Xunta con todas as persoas que poidan verse afectadas por calquera forma de violencia e asegurou que “promover a liberdade, a dignidade e o benestar fortalece a nosa sociedade”. Por esta razón, rematou, “Galicia decidiu liderar este avance cara a un entorno dixital máis seguro e inclusivo para todos”.

A formación estivo dirixida ao persoal dos Centros de Información á Muller, da rede de acollida, oficinas de atención a vítimas, recursos especializados e entidades sociais. Durante as xornadas, abordouse como identificar este tipo de violencia, senón tamén como acompañar correctamente ás vítimas.

Ademais, traballouse en protocolos de actuación, acompañamento emocional, tratamento humano e especializado, así como sobre a importancia das evidencias dixitais dentro de calquera proceso xudicial.

Plataforma especializada

Ademais, desde este momento ponse ao dispor de todos os profesionais participantes unha plataforma especializada con recursos e ferramentas prácticas para a protección das vítimas, que poderán empezar a utilizar de xeito inmediato no seu traballo diario. Para garantir o máximo aproveitamento desta ferramenta, celebraranse tamén dúas xornadas en liña de seguimento e resolución de dúbidas cos profesionais que xa participaron na formación presencial.

Así mesmo, poñerase en marcha unha nova edición integramente en liña deste curso, dirixida a aqueles profesionais que non puidesen asistir ás sesións presenciais e desexen acceder a esta formación especializada, que será obrigatoria unha vez aprobada a lei.