Nova

Ribadeo (Lugo), 30 de maio do 2026

O director xeral de Maiores e Atención Sociosanitaria, Antón Acevedo, participou esta tarde no I Foro do Alzheimer de Ribadeo, un encontro que destacou como fundamental para dar visibilidade ás necesidades das persoas afectadas por esta doenza e ás do seu entorno. Polo que, felicitou o concello por impulsar e apoiar estas iniciativas necesarias para abordar todo o relativo a esta doenza, a súa detección e tratamento.

Neste sentido, Antón Acevedo expuxo a importancia de fomentar estes encontros de diálogo e reflexión entre os expertos sanitarios, as entidades sociais e as familias, que son as que viven cada día a realidade desta doenza. O obxectivo é, segundo recalcou, poñer de manifesto as necesidades das persoas afectadas e buscar novas formas de mellorar a atención e o acompañamento; así como abordar os novos tratamentos e avances médicos.

A isto engadiu a aposta da Xunta por fortalecer a rede pública de centros de día para persoas con Alzheimer, pioneira en España e que conta con 560 prazas gratuítas e especializadas. Por iso mesmo, puxo en valor tamén o traballo das entidades sociais deste eido, que realizan un labor fundamental no acompañamento ás familias e estendendo o apoio do Goberno galego ás persoas que máis o precisan.