Nova

Santiago de Compostela, 11 de abril do 2026

A conselleira de Política Social e Igualdade, Fabiola García, destacou esta tarde o compromiso do Executivo autonómico por ofrecer ás persoas maiores centros residenciais de calidade con todos os coidados que necesitan e nos que se sintan como nos seus fogares. Fíxoo durante unha visita á residencia de maiores pública autonómica de Marín, na que están a punto de rematar os traballos de mellora das instalacións e nos que se investiron 1,5 millóns de euros.

Fabiola García, que estivo acompañada da alcaldesa do concello, María Ramallo, explicou que o obxectivo destas obras é que os residentes se sintan cómodos, respectados e nunha contorna familiar. Neste sentido, indicou que o Goberno galego está a destinar nesta lexislatura 40 millóns de euros a reformar e modernizar a rede de centros da Xunta, con actuacións por toda a comunidade: A Estrada, Lugo, Pontevedra, Ferrol, A Coruña, Antas de Ulla, Burela, Barbadás, O Carballiño ou Marín, entre outros concellos.

A conselleira sinalou que a mellora continua das instalacións, o mantemento adecuado e a incorporación de solucións innovadoras na atención demostran o compromiso real co coidado integral das persoas maiores. No caso da residencia de Marín, as obras céntranse na mellora da fachada e do illamento térmico do edificio para gañar en eficiencia enerxética. Tamén se redistribúen espazos interiores do centro para aumentar o benestar dos usuarios e do persoal, así como mellorar a accesibilidade.