Nova

Xunqueira de Ambía (Ourense), 20 de marzo de 2026

O presidente da Xunta, Alfonso Rueda, destacou hoxe a nova residencia de maiores municipal María Puga Martínez, en Xunqueira de Ambía, como o exemplo do compromiso da Xunta co rural galego para que calquera poida ser coidado no seu sitio: “Á xente hai que coidala, dende que nace ata o final da súa vida. A obriga das Administracións é intentar atender as súas necesidades na medida do posible, e cando a xente se vai facendo maior é cando hai que poñer máis esforzo. E en iso estamos aquí”, resaltou Rueda.

Así o destacou, acompañado pola conselleira de Política Social e Igualdade, Fabiola García, durante a inauguración do novo centro municipal, que contou cun investimento de 1,7 millóns de euros —dos cales a Xunta achega 1,2 millóns e a Deputación de Ourense o resto—. Este novo centro asistencial ofrece un total de 50 prazas para os veciños e veciñas da comarca —actualmente xa conta con 18 residentes— e creará 30 postos de traballo.

Esta infraestrutura é a primeira que se completa dentro do Plan de Investimentos acordado polo Goberno galego coa Federación Galega de Municipios e Provincias (FEGAMP). A través deste Plan, a Xunta pon a disposición dos concellos de menos de 20.000 habitantes 18,5 M€ de fondos europeos para ampliar e mellorar a rede de centros de servizos sociais municipais e que están destinados ás persoas maiores: residencias, centros de día, vivendas comunitarias e centros sociais. Nese sentido, Rueda  resaltou que desde o seu Goberno “fixemos un esforzo económico importante. Queremos asegurar ás persoas que teñen grados de dependencia que nos preocupamos por elas. Temos que atendelas, e por iso firmamos ese acordo”.

Así, das arredor de 100 propostas presentadas, seleccionáronse 24 de toda Galicia, que suporán máis de 680 prazas ­­—568 novas prazas públicas residenciais e outras 114 prazas públicas en centros de día—. A provincia de Ourense é a que máis proxectos e orzamento concentra do Plan (o 60%), albergando 16 proxectos que suman un investimento total por parte da Xunta de 12 M€: “O noso obxectivo é cumprir o compromiso de ampliar o número de residencias e de centros de día. En toda Galicia, e especialmente onde máis falta fixera e onde máis colaboración tivéramos tamén. E aquí en Ourense encontramos moita colaboración”, salientou.

En concreto, na provincia de Ourense financiarase a construción, mellora ou ampliación de 12 residencias; dous novos centros de día; a reforma dun centro integral con servizos de atención diúrna e residencial; e un novo centro social. En total, crearanse máis de 400 novas prazas públicas, impulsando unha completa rede de centros municipais que será fundamental para a provincia.

Este Plan, tal e como apuntou o presidente Rueda, é tamén un exemplo de colaboración entre as distintas administracións, sumando esforzos para dar un impulso histórico á rede de servizos para as persoas maiores que viven en concellos pequenos e de carácter rural: “Oxalá cunda o exemplo, porque xuntos facemos máis, temos máis forza e podemos chegar a máis xente”, apuntou o presidente.

Atención á dependencia en Galicia

Durante a súa intervención, o titular do Goberno galego lembrou os avances en materia de política social, apuntando a que desde o 2009 se triplicou a oferta de prazas públicas en residencias, superando as 16.000 actuais, e que o obxectivo é impulsar 3.500 novas ata o ano 2028.

Así mesmo, e co obxectivo de ofrecerlle a cada galego e galega todas as facilidades para facerse maior como libremente desexe, a Xunta consolida axudas como o Bono Coidado no Fogar (que conta con 38.000 beneficiarios) e o Servizo de Axuda no Fogar (con 23.000 usuarios), cuxa achega por parte da Administración autonómica increméntase nun 50% tras o acordo coa FEGAMP.