Nova
Compartir
A Xunta defende que Galicia é a única comunidade que leva 20 anos ofrecendo ininterrompidamente unha prestación a vítimas de violencia de xénero
Roberto Barba explicou que neste período o Goberno galego investiu máis de 65 millóns de euros de fondos propios
Sinalou que se trata dunha medida fundamental para garantir a recuperación integral e emancipación das mulleres que sufriron violencia machista
Santiago de Compostela, 5 de marzo do 2026
O director xeral de Loita contra a Violencia de Xénero, Roberto Barba, defendeu esta mañá que Galicia é a única comunidade do país que leva ofrecendo durante 20 anos e de xeito ininterrompido unha prestación económica ás vítimas de violencia de xénero. Durante a súa resposta a unha pregunta oral na Comisión 5ª do Parlamento explicou que se sufraga integramente con fondos propios.
Roberto Barba explicou que nos últimos vinte anos o Goberno galego investiu máis de 65 millóns de euros de fondos propios para ofrecer esta axuda económica a todas as mulleres vítimas de violencia machista en Galicia. A isto engadiu, que grazas á reforma lexislativa do ano 2016, as vítimas de trata tamén poden beneficiarse desta achega ao ser consideradas como vítimas da violencia de xénero.
Así mesmo, o director xeral explicou que se trata dunha medida fundamental para garantir a recuperación integral das vítimas e que contribúe a facilitar a súa emancipación e independencia económica, algo imprescindible para que poidan comezar un novo proxecto vital.