Nova

Vilamarín (Ourense), 28 de febreiro do 2026

A conselleira de Política Social e Igualdade, Fabiola García, destacou esta mañá o “importante pulo” que a Xunta está a dar á rede local de atención ás persoas maiores a través do Plan de investimentos para a construción, reforma ou ampliación de centros municipais. Así o asegurou na súa visita ás obras do centro de día de Vilamarín, un dos novos equipamentos impulsados na nosa comunidade ao abeiro deste plan e no que o Goberno galego inviste 600.000 euros.

Fabiola García, que estivo acompañado do alcalde do municipio ourensán, Amador Vázquez, sinalou que o Goberno galego inviste 600.000 euros na construción deste centro ao que se suma a colaboración da Deputación de Ourense que achega 200.000 euros para o equipamento do inmoble.  Así mesmo, explicou que este servizo disporá de 30 prazas públicas e cuxa titularidade e xestión corresponderá á Administración local.

Ademais deste centro de día, a Xunta está a financiar outra vintena de actuacións con cargo ao Plan de investimentos, ao que se destinan 18,5 millóns de euros de fondos europeos. O programa de intervencións inclúe residencias, centros de día, vivendas comunitarias e centros sociais, e foi acordado coa Federación Galega de Municipios e Provincias (Fegamp) e que permitirá crear 682 novas prazas públicas de atención diúrna e residencial. Deste orzamento, 12 millóns de euros, que supoñen o 65% do total do plan, estanse a empregar en proxectos da provincia de Ourense.