Nova
Compartir
A Xunta financia con 50.000 € a compra dun vehículo adaptado para o concello de Trazo
Este novo recurso, que estará en breve a disposición dos usuarios, está destinado a favorecer a mobilidade das persoas con discapacidade, maiores e con mobilidade reducida do municipio
Fabiola García destaca que o obxectivo é “garantir a igualdade de oportunidades e a inclusión social, evitando un dos males do noso tempo: a soidade non desexada”
Trazo (A Coruña), 9 de xaneiro de 2026
A conselleira de Política Social e Igualdade, Fabiola García, acompañada da alcaldesa de Trazo, Josefina Suárez, e da directora xeral de Persoas con Discapacidade, Begoña Abeijón, presentou esta mañá o novo vehículo de transporte adaptado co que contará o municipio grazas a unha achega da Xunta de Galicia de 50.000€.
Este novo recurso, que estará en breve prazo de tempo a disposición dos usuarios, está destinado a favorecer a mobilidade das persoas con discapacidade, maiores e con mobilidade reducida do municipio. O obxectivo é facilitar que poidan asistir a programas de estimulación terapéutica, iniciativas de respiro familiar ou ao centro social municipal.
Neste sentido, a conselleira destacou que a finalidade é “garantir a igualdade de oportunidades e a inclusión social, evitando un dos males do noso tempo: a soidade non desexada”. Fabiola García explicou que o obxectivo é responder á dispersión xeográfica galega “creando máis recursos de proximidade no rural e ofrecendo ás persoas maiores e con discapacidade todo o que precisen para poder vivir no lugar que queiran”
O Concello de Trazo empregará este novo vehículo adaptado para poder trasladar a persoas maiores e con dificultades na mobilidade a citas en servizos públicos como o centro de saúde, entre outras necesidades.