Nova

A Coruña, 18  de setembro de 2025

A conselleira de Política Social e Igualdade, Fabiola García, visitou esta mañá o punto informativo dos centros Quérote+ na Universidade da Coruña e conversou co alumnado e a comunidade educativa que se achegaron para coñecer o funcionamento deste recurso. Desde alí, fixo un chamamento á cidadanía para animala a facer achegas á futura Lei de acoso e violencia dixital, que estará en consulta pública ata o 1 de outubro.

Fabiola García tivo ocasión de presentar ao alumnado os recursos que a Xunta pon a disposición da mocidade para sensibilizar, previr e detectar a violencia de xénero, así como recursos específicos como os Quérote+ para asesoralos sobre as relacións igualitarias, respectuosas no bo trato e en materia LGBTI.

A conselleira lembrou que calquera persoa que o precise pode achegarse a este servizo ou a calquera outro da Xunta de Galicia, como os Centros de Información á Muller, onde poderán recibir axuda, información e mesmo acompañamento de xeito gratuíto. Deste xeito, indicou que ademais do traballo que realizan de xeito presencial, tamén contan con canles específicas para mensaxería e videochamadas.

Nesta liña, Fabiola García indicou que o Executivo galego quere estar presente en todos os eidos para combater calquera tipo de violencia, para o que é fundamental – dixo- actuar na contorna dixital. Por iso mesmo, lembrou que a Xunta está traballando na primeira Lei de violencia dixital de España, que permitirá dar protección integral ás vítimas de agresións na rede, tipificar os delitos e combatelos.

Ademais, a conselleira trasladoulle algúns dos aspectos principais desta futura norma que permitirán actuar de xeito integral sobre calquera violencia como o borrado da pegada dixital ou servizos de asesoramento para identificar os delitos e facilitar a súa denuncia.

Puntos informativos nos campus

O servizo Quérote+ sumouse, deste xeito,  ás xornadas de benvida que organizan as universidades galegas no inicio do curso para dar a coñecer o funcionamento e actividades que a Xunta desenvolve a través deste recurso.

Con esta finalidade, instaláronse mesas informativas nos campus e organizáronse obradoiros sobre ‘O coidado dos vínculos afectivos’, nos que se abordan as relacións igualitarias, respectuosas e o bo trato. No curso anterior, segundo os datos facilitados polas respectivas universidades, as xornadas de benvida recibiron a un total de 4.500 persoas mozas, datos que se estiman semellantes no curso que se vén de iniciar.

Directorio Centros Quérote+