Nova

Santiago de Compostela, 23 de agosto de 2025

A Xunta activa os convenios de colaboración coa Asociación Solidariedade Galega co Pobo Saharauí (SOGAPS) co obxectivo de mellorar as condicións de vida dos menores participantes no programa Vacacións en Paz. A Consellería de Presidencia, Xustiza e Deportes asinou un convenio con importe de 100.000 euros para apoiar o programa, que cada ano traslada 113 menores saharauís procedentes dos campamentos de refuxiados de Tindouf, en Alxeria, para pasar dous meses de verán en acollida por familias galegas.

Este convenio é complementario con outro asinado pola Consellería de Política Social e Igualdade, do mesmo importe, o que suma unha achega total de 200.000 euros por parte do Goberno galego.

A SOGAPS é a única asociación galega recoñecida polas autoridades saharauís para a realización de proxectos nos campamentos de refuxiados en apoio da súa poboación. Dende hai anos colabora en diversas iniciativas para, entre outros obxectivos, garantir a seguridade alimentaria, así como apoiar o sistema sanitario e a atención primaria ou a protección da infancia, onde se enmarca o programa Vacacións en Paz.

A Consellería de Política Social financia o programa, mentres que a participación da Consellería de Presidencia, Xustiza e Deportes céntrase en apoiar intervencións no sector sanitario e de seguridade alimentaria nos campamentos de refuxiados. Este ano colaboraron ambas as consellerías para garantir o traslado dos 113 nenos e nenas saharauís durante o verán.

Apoio ao pobo saharauí

A Xunta participa dende hai anos en diversos proxectos que se están a executar nos campamentos de persoas refuxiadas saharauís. A resposta de axuda para paliar e reducir a vulnerabilidade nas crises humanitarias con eficacia e calidade é un dos ámbitos estratéxicos do V Plan Director da Cooperación Galega 2023-2026, sendo a poboación saharauí unha figura prioritaria dentro da mesma.

De feito, a Asociación Solidariedade Galega co Pobo Saharahuí é o axente de cooperación que ten canalizado a maior parte dos fondos que a Cooperación Galega destina á poboación refuxiada saharauí a través de actuacións de acción humanitaria, que se eleva a preto de 1,5 millóns de euros, contando o recente convenio para o programa Vacacións en Paz.