Nova

Santander (Cantabria), 27 de maio de 2025

A conselleira de Política Social e Igualdade, Fabiola García, destacou esta mañá que o Goberno galego convocará este 2025, por terceiro ano consecutivo, as axudas para enfermos de ELA e as súas familias, uns apoios aos que destinará un orzamento de 3M€. Así o avanzou no Encontro Interterritorial sobre a implantación da Lei ELA celebrado no Palacio da Magdalena, onde lamentou que o Goberno central segue sen achegar nin concretar financiamento meses despois da aprobación la Lei ELA.

Fabiola García participou neste evento, organizado pola Confederación Nacional de Entidades de ELA, e que tivo como lema Unidos pola ELA. Da Lei á realidade, ao que tamén asistiu o director xeral de Maiores e Atención Sociosanitaria, Antón Acevedo, Concretamente, a conselleira interveu nunha mesa de debate sobre boas prácticas, xunto a representantes do Goberno central de comunidades como Navarra, Cantabria, A Rioxa ou a Comunidade Valenciana.

Na súa intervención, a conselleira destacou o papel de Galicia no relativo ao apoio das persoas con ELA e das súas familias. Neste sentido, lembrou que a comunidade galega “marcou o paso a nivel nacional” na atención ás persoas con ELA, sendo a primeira comunidade en convocar axudas directas e automáticas. Lembrou que estes apoios, que chegaron a unha media de 200 beneficiarios ao ano, ascenden a 12.000€ anuais e que se conceden de xeito inmediato e sen realizar complicados trámites burocráticos.

Fabiola García destacou que estas axudas poden destinarse a costear as necesidades que poidan ir xurdindo co avance da enfermidade como a adquisición de produtos de apoio (como grúas, cadeiras de rodas ou camas), de aparatos de aire acondicionado, a adaptación funcional do domicilio ou da contorna, a compra dun vehículo adaptado ou a atención fisioterapéutica, de rehabilitación ou psicolóxica.

A conselleira fixo fincapé en que, ademais de apoios financeiros, a Xunta tamén ten reforzado a atención clínica e a valoración da dependencia, apostando pola atención humana tanto a nivel sanitario como a nivel social. Concretamente, Concretamente, lembrou que Galicia conta desde hai varios anos cunha vía preferente para as solicitudes de dependencia das persoas con ELA.

Unha lei estatal sen financiamento

En canto á valoración da Lei ELA, Fabiola García definiu esta normativa como “urxente, xusta e necesaria” pero que “a día de hoxe segue baleira de contido pola ausencia de financiamento por parte do Goberno central”. Neste sentido, fixo fincapé en que “os dereitos sen financiamento, o único que xeran é frustración”.

Por esta razón, a conselleira esixiu ao Executivo central “a asignación inmediata dos fondos necesarios para que esta lei se cumpra en todos os seus puntos”. Fabiola García destacou que este financiamento “é urxente” para que cada paciente reciba a atención domiciliaria que necesita, a tecnoloxía de apoio e o acceso a profesionais formados e que “é de xustiza” para que os familiares “non sigan asumindo en soidade o custo emocional e económico”.