Nova

Santiago de Compostela, 26 de maio de 2025

A directora xeral de Promoción da Igualdade, María Quintiana, recibiu esta mañá no CIFP Compostela ao alumnado de 2º da ESO do IES Plurilingüe de Valga para facerlle a entrega da revista Donas de si e unha entrevista, ambas as dúas accións enmarcadas no programa, co mesmo nome, que ten Igualdade dentro do Plan Proxecta. Durante o encontro, destacou a boa acollida das iniciativas educativas a prol da igualdade de xénero, que amosa o compromiso da mocidade.

María Quintiana coñeceu da man do alumnado todo o traballo realizado ao longo do curso para afondar na igualdade de xénero. Así, para a elaboración da revista traballaron sobre os estereotipos de xénero, a violencia de xénero, mulleres feministas referentes ou os mitos do amor romántico, entre outros. Deste xeito, Quintiana agradeceu o compromiso das mozas e mozos por querer traballar arredor desta materia, ao tempo que os felicitou polo desenvolvemento do seu proxecto.

A preguntas do alumnado durante a entrevista, a directora xeral explicoulles os diferentes proxectos e programas e proxectos nos que se está traballando desde a Xunta de Galicia, sempre baixo a máxima de unir a toda a sociedade no camiño cara a igualdade. Neste sentido, faloulles da campaña O noso canto do 8M, que tivo o obxectivo de demostrar a forza da unión interxeracional do feminismo; as áreas de igualdade e puntos lila e arco iris nos principais festivais de música, así como todo o traballo que se desenvolve a través dos centros Quérote+.