Nova

Vilasantar (A Coruña), 27 de marzo de 2025

O director xeral de Inclusión Social, Arturo Parrado, puxo en valor o proxecto de inclusión sociolaboral da Asociación Raíña Paraíso que ofrece ás persoas en risco de exclusión formación e capacitación en agricultura para potenciar as súas saídas laborais. Así o sinalou esta mañá na visita á Escola de Agricultura Ecolóxica de Vilasantar onde se desenvolve o programa e na que tamén participou a delegada territorial da Xunta na Coruña, Belén do Campo e o alcalde de Vilasantar, Fernando Pérez Fernández.

Arturo Parrado fixo fincapé na colaboración entre o Executivo galego e a entidade para impulsar itinerarios de inserción laboral específicos e que axuden a previr o risco de exclusión social. Neste sentido, o director xeral sinalou que a Xunta de Galicia concedeu este ano máis de 102.000 euros en achegas a través da convocatoria do IRPF a esta asociación para poñer en marcha diferentes programas neste eido.

O director xeral destacou os itinerarios que desenvolven para capacitar ás persoas en risco de exclusión social, que viven en zonas rurais, de ferramentas e coñecementos específicos en materias como a agricultura ecolóxica. Deste xeito, búscase potenciar e mellorar o seu acceso a diferentes empregos e saídas laborais.

Neste sentido, Parrado sinalou tamén as actuacións que desenvolven coas persoas internas do centro penitenciario de Teixeiro, facilitándolle formación tamén en diferentes ramas da agricultura ou a xardinería para favorecer o seu proceso de reinserción social.

Ademais, durante a súa visita, o director xeral agradeceu o labor que desenvolve esta entidade para mellorar a situación das persoas máis vulnerables e trasladou o compromiso da Xunta para seguir colaborando co tecido asociativo e reforzando os programas de inserción sociolaboral. Así mesmo, destacou a boa colaboración institucional entre a Xunta de Galicia, a entidade Raíña Paraíso e o concello de Vilasantar, titular das instalacións onde se realizan estas actividades.