Nova

Santiago de Compostela, 20 de febreiro de 2025

O director xeral de Maiores e Atención Sociosanitaria, Antón Acevedo, sinalou esta mañá que o programa Xuntos polo Nadal impulsado pola Xunta de Galicia xa está consolidade como un referente na promoción do envellecemeto activo. Así o sinalou esta mañá na Comisión 5ª do Parlamento como resposta a unha pregunta oral.

Antón Acevedo fixo fincapé en que na última edición do programa o número de solicitudes recibidas volveu ser un éxito, superando as 430,  e que novamente se volveron cubrir todas as prazas ofertadas, un total de 270 para as dúas Residencias de tempo libre da Xunta situadas en Nigrán e no Carballiño.

Neste sentido, o director xeral destacou que todos os participantes puideron desfrutar dunha estancia completamente gratuíta desde o día 24 de decembro ata o 7 de xaneiro. Así, sinalou que a Xunta de Galicia investiu nesta edición preto de 140.000 euros para o desenvolvemento do programa que contempla o traslado dos participantes ata as Residencias de tempo libre.

Así mesmo, Antón Acevedo explicou que o programa contempla tamén a realización de actividades para fomentar as relacións interpersoais dos participantes como o campionato de tute, a ximnasia de mantemento ou as excursións culturais. Ao respecto, destacou que están acompañados cada día por un amplo equipo de persoal sociosanitario e de animadores culturais que deseñan o itinerario.

Antón Acevedo trasladou no Parlamento que este programa forma parte do compromiso da Xunta de Galicia para fomentar o envellecemento activo entre os maiores e impulsar accións que combatan a soidade non desexada, polo que avanzou que desde a Administración autonómica seguirán traballando en iniciativas que melloren a calidade de vida dos maiores.