O apoio post-adoptivo está previsto para os casos de adopcións que se realizan dentro do Programa de Adopcións Especias de Galicia (en diante, PAEG).

Este programa está orientado a nenos, nenas e adolescentes en situación de adaptabilidade que mostran unhas características que dan lugar a unha maior dificultade para atoparlles unha familia no programa común de adopción. As situacións que poden afectar as persoas menores, son:

1. Ser maior de oito anos.
2. Pertencer a un grupo de tres ou máis irmáns.
3. Padecer algunha enfermidade crónica, ter discapacidade física, psíquica ou sensorial.
4. Presentar outras características distintas das anteriores que poden condicionar, igualmente a adopción.
5. Estar inmerso nun proceso de adopción aberta.

O PAEG ten como un dos seus obxectivos específicos “apoiar as familias e á persoa menor, no proceso de integración adoptiva para o establecemento e a consolidación dun vínculo de apego reparador”.

En base a este obxectivo o PAEG prestará apoio, asesoramento e acompañamento individualizado ás familias no proceso de adopción. Prestarase tanto ás familias que inicien a convivencia adoptiva estando xa incluídas no programa como a aquelas outras que, non estando incluídas anteriormente no programa, sexan derivadas polos ETM por presentar problemas de convivencia ou preverse especiais dificultades de integración.

Desde o momento no que a persoa menor convive coa familia adoptiva deberase realizar o seguimento particular para avaliar a integración na familia e en colaboración e contacto co ETM, apoiar e asesorar nas necesidades que se presenten, proporcionando información e apoio na obtención de servizos sociais, sanitarios e educativos, así como outros recursos especializados que precisen.

Obxectivos:

• Valorar a evolución da integración do neno, nena ou adolescente en garda con fins de adopción.
• Detectar as necesidades das persoas menores susceptibles de adopción e da familia que se ofrece para a adopción.
• Proporcionar soporte psicolóxico, social e educativo ás familias que se ofrecen para a adopción e intervir a través do apoio en situacións de crises.
• Prestar a orientación necesaria para a evolución adecuada da garda con fins de adopción e da adopción propiamente dita.
• Participar na proposta dos ETM dos Departamentos Territoriais, nos procedementos de adopcións abertas que lles sexan presentados, de conformidade coas instrucións e circulares emitidas pola Dirección Xeral de Familia, Infancia e Dinamización Demográfica.

O acompañamento manterase durante un mínimo de dous anos. Unha vez finalizado, poderá volver ampliarse xurdísense novos problemas ou dificultades na integración.

Durante esta fase a entidade adxudicataria remitirá aos ETM un informe de seguimento aos 2, 6, 12, 18 e 24 meses desde o inicio da convivencia, ademais do que proceda, con carácter puntual, se se producen incidencias relevantes. No caso de adopcións abertas emitiranse informes periódicos durante os dous primeiros anos, e transcorridos estes, a pedimento do xuíz.

Procedemento

Cando nun departamento territorial xurda un caso dunha persoa menor, que polas súa características non sexa posible atoparlle familia para a súa integración familiar en garda adoptiva, o departamento territorial ao que pertence a persoa menor poderá solicitar que se lle busque familia nos outros departamentos territoriais.

Para iso deberá instar os servizos centrais (DXFIDD) que se proceda a solicitar aos demais departamentos territoriais a procura de familia para a persoa menor, debendo achegar coa petición un informe sobre o NNA concreto para o que se solicita a intervención.

Unha vez recibida en SS.CC a petición do departamento territorial acompañada do informe da persoa menor, procederase a comunicarlle e enviarlle ao resto dos departamentos territoriais a petición e informe, dándolles un prazo de 30 días para a procura de familia. En paralelo e de maneira simultánea, comunícase e envíase a petición e información ao PROGRAMA DE ADOPCIÓNS ESPECIAIS DE GALICIA (PAEG) , comunicándolle, nesa petición, que deberán esperar 30 días para poder iniciar a procura de familia, á espera de que desde os departamentos territoriais confirmen a non dispoñibilidade de familia; deste xeito o que se pretende é ir avanzado a información para a previsión dos supostos que non se atopara familias no resto das territoriais, debendo darse unha correcta comunicación e coordinación entre os equipos.

Finalizado ese prazo de 30 días sen que as territoriais propuxeran unha familia, o PAEG poderá presentar unha posible familia adoptante, integrante do seu programa.

Igualmente, os Equipos Técnicos do Menor poderán derivar directamente ao PAEG a aquelas familias que, xa iniciada a convivencia adoptiva coa persoa menor, presenten problemas de convivencia ou cando se prevexan especiais dificultades na integración, aínda que non formasen parte inicialmente das familias pertencentes ao PAEG. (FOLLA DE DERIVACIÓN )

A entidade adxudicataria elaborará o plan de seguimento da adopción que será aprobado polo ETM do Departamento Territorial correspondente e axustarase a periodicidade que se estableza previamente con este.

Este plan presentarase ao ETM do Departamento Territorial correspondente, o momento da incorporación do NNA á familia. O seguimento abordará unha avaliación individual da persoa menor, a evolución da súa relación coa familia biolóxica, (no caso de tratarse dunha adopción aberta) e a avaliación da convivencia na familia adoptiva.

A entidade adxudicataria comunicará ao Departamento Territorial correspondente calquera incidencia que se produza durante a garda con fins de adopción da persoa menor e levará a cabo en colaboración co ETM as intervencións especializadas que sexan precisas para atender de forma adecuada as problemáticas que se presenten.