Manual de procedemento de intervención dos Servizos Sociais Especializados en materia de protección á infancia e adolescencia da Xunta de Galicia en situacións de risco e desamparo

Este Manual de procedemento de intervención dos Servizos Sociais Especializados en materia de protección á infancia e adolescencia da Xunta de Galicia define o marco normativo, así como o seu procedemento de actuación e os criterios e instrumentos técnicos a utilizar na intervención con nenos, nenas e adolescentes vítimas de desprotección grave ou moi grave na súa familia. O seu obxectivo principal é dotar de estratexias e ferramentas técnicas aos e as profesionais dos devanditos servizos, a fin de servirlles de guía nas distintas fases de intervención protectora con persoas menores de idade en situación de desprotección.

Á súa vez, o Manual ten como obxectivos dar a coñecer a todas as institucións implicadas na protección á infancia e á adolescencia e ao conxunto da cidadanía, o modo de traballo da Entidade Pública de Protección de Galicia e homoxeneizar as actuacións neste ámbito das catro direccións territoriais da Consellería de Política Social e Mocidade.

A elaboración deste Manual iniciouse en 2022 e nel participaron un amplo número de profesionais de acreditada experiencia dos Servizos Sociais Especializados en materia de protección á infancia e adolescencia das catro provincias galegas, debido á vontade de que fose consensuado con quen no día a día terán que poñelo en práctica. Estes profesionais traballaron baixo a coordinación da Subdirección Xeral de Política Familiar, Infancia e Adolescencia da Consellaría de Política Social (Xunta de Galicia) e co apoio dun equipo da Universidade do País Vasco UPV/EHU.

A todos eles e elas gustaríanos agradecer sinceramente a súa colaboración e o interese que puxeron nesta tarefa, que confiamos sexa de utilidade para mellorar a calidade da atención protectora que desde os Servizos Sociais Especializados da Consellaría de Política Social (Xunta de Galicia) debemos prestar á infancia e a adolescencia.

Este grupo de traballo tomou como referencia para a primeira versión do Manual os documentos dun texto similar desenvolvido polo Departamento de Acción Social da Deputación Foral de Bizkaia (sen publicar). A Xunta de Galicia agradece a disposición do este departamento para compartir o seu traballo.

Os contidos deste Manual ampliaranse e actualizaranse progresivamente, co obxectivo de facilitar orientar e prescribir r as tarefas do persoal que integra a Entidade Pública e mellorar a atención que reciben os nenos, nenas e adolescentes en situación de desprotección.

As propostas de mellora ou de corrección de contidos poden remitirse por correo electrónico á dirección proteccionmenores@xunta.gal

---

---